الشهيد

قصيده ...الشهيد
( للشاعر عبد الرحمن يوسف )


كان ياما كان...كان فيه شهيد فاكرينه ماتْ

واقف بيتفرج علينا من سكاتْ

يدخل علينا زي نور المشربية

و يزيد له شوقنا مع حديث الذكرياتْ

يمسح دموع الأمهاتْ"

صوت المظاهرة يلهمهْ

طالع لجنّة ربنا علي سلمهْ

و الكام رصاصة الدفيانين جواه ما عادش بتؤلمهْ

أيوة ما عادش بتؤلمهْ

إلا أما واحد صاحبه يبكي عليه و يتشحتف بكلمة زي: الله يرحمه!".

خلفتي يا مصر و من خلف شهيد ما ماتْ

سبعتلاف عام مواكب خير بتتوالي

خلفتي فرحة و فرحة غيرنا لسة ما جاتْ

خلفتي كلمة لأمة لسة قوالة

خلفتي راجل بيهزم جيش من الأغواتْ

نعلي بأفعالنا و نفوسنا ما تتعالي

بننحسب بالغلط في لستة الأمواتْ

و احنا اللي ما عشنا فوق ضهر الوجود عالةْ "

كان ياما كان

كان فيه شهيد

كانت نهايته أو بدايته لما يوم حفروا القنالْ

خلف شهيد

كانت بدايته لما يوم عبروا القنالْ

خلف شهيد عاش كالرجالْ

حربه اسمها اللقمة الحلالْ

كان فيه شهيد عايش سؤالْ

مين اللي ماسك دفة المركب و حادف ليه شمالْ؟."

كان ياما كان

كان فيه شهيد

خلف شهيد جاور شهيد

كان جد جده كمان شهيد

صاحب شهيد ناسب شهيد

جوّز بناته الخمسة لولاد الجيران

طلعم ولاد عم الشهيد

جارهم شهيد

عاشُم و ما عاشُم يقاموا القتل في الطوابيرْ

ماشيين علي المساميرْ

و الكل بيعظّم سلام لعصابة الخنازيرْ"
و الظلم فاضْ

هات طوبة ياضْ

داخلين علينا البلطجية طوال عراضْ

راكبين جمال شبه القراضْ

حصّلني دوغري عند عب منعم رياض

بتقوللي عب منعم رياض؟

مش قلت لك؟
كان فيه شهيد خلف شهيد خلف شهيد

طب ايه الجديد؟

ربك يريد!"

إنت الشهيد اللي جبينك ضيْ

واخد تلات رصاصات علي شومة ما قلت الأيْ

زينة ولاد الحيْ

و انتي الشهيدة عروسة مالهاش زيْ

انت الشهيد و قصيدتي ماشية ف موكبك بتزُكْ

إنت اليقين في أمة عاشت عمرها بتشكْ

ماشي ف طريقك محترم و الكل ماشي يعكْ

نزلتنا بأسلوبك انت لزحمة الميدان من زحمة الفيس بوكْ"

منصورة بينا يا مصر منصورة

رسمنا ثورتنا بلون العدلْ

و عملنا م الدبابة سبورة

نكتب عليها رأينا في الندلْ

و نجيب ولادنا لجل ياخدوا جنبها صورةْ

ماشيين بقدرة ربنا ع الحبلْ

ما يهمناش السجن و لا القتلْ

نايمين علي الأسفلت شوكة ف حلق أي عصابة محشورةْ

منصورة بينا يا مصر منصورةْ







إن شاء الله يعجبكم اختياري
في ذكرى شهداء الثورة